माझा अभंग माझी ओवी। नतद्रष्ट गाथा गोवी,
इंजिनावीण गाडी जेवी। घरंगळे॥
कुठे ज्ञानेश्वर श्रेष्ठ। कुठे तुकाराम पवित्र,
कुठे समर्थ धीरोदात्त। संत सर्व॥
संत शब्दांचे नायक। संत अर्थाचे धुरंधर;
एक शब्दांचा किंकर। डफ्फर मी॥
ज्ञान-विज्ञानी उमाळा। सत्ता मारी तिर्पा डोळा,
सोन्या चांदीचा सोहळा। आततायी॥
ऐशा टापूत चौफेर। नाही माहेर-सासर;
कैंचे गोत्र वा प्रवर। अनामिका॥
नेणें बिजली वा पणती। स्थिर आहे तरी दृष्टी;
आपद्धर्में नाही कष्टी। बावळा मी॥
परि फाटे हे अंतर। आणि जन्मा येई अंबर!
तोडा नाळ अवडंबर। नारायणा॥
