"देवाजीने करुणा केली,
भातें पिकुनी पिवळी झाली."
देवाजीने करुणा केली,
सकाळ नित्याची ही आली
जणु पायाने चित्त्याच्या अन्
रस्ता झाडी झाडूवाली.
घराघरांतिल चूल पेटली;
चहा उकळुनी काळा झाला;
जरा चढवितां दुसरें भांडें
भातहि शिजुनी होइल पिवळा.
देवाजीने करुणा केली :
रोजचीच पण 'बस'ही आली
जणु पायाने हरिणीच्या अन्
शिरस्त्यांतली कामे झाली.
घरी परततां, भाजीवाली
समोर दिसली, भरली थैली;
दो दिडक्यांची कडू दोडकीं
जरी पिकूनी झाली पिवळीं.
उजाडतां जे उजाड झालें,
झोपीं गेलें मावळतां तें :
करील जर का करुणा देव
बिचकुनी होतिल हिरवीं भातें !